उर्लाबारी, मोरङ। उर्लाबारी–९ थक्लुङ चोकमा देउसी–भैलो कार्यक्रमबाट संकलित रकम उपयोग गर्दै गाउँको सुरक्षा व्यवस्थामा थप सुदृढता ल्याउने उद्देश्यले सिसि क्यामेरा जडान गरिएको छ। समुदायकै आर्थिक योगदान र सक्रिय सहभागितामा सम्पन्न यो काम थक्लुङ चोकलाई सुरक्षित र व्यस्थित बनाउने ठूलो पहलका रूपमा हेरिएको छ।
सिसि क्यामेरा जडानको उद्घाटन तथा औपचारिक कार्यक्रम टोल विकास समितिका अध्यक्ष राजन रायमाझीको अध्यक्षतामा सम्पन्न भयो। कार्यक्रममा वडा अध्यक्ष नरबहादुर मोक्तान प्रमुख आतिथिका रूपमा उपस्थित रहँदै स्थानीयको यस्तो सकारात्मक योगदानले गाउँको समग्र सुरक्षा अवस्थालाई नै उकास्ने विश्वास व्यक्त गर्नुभयो।
उक्त क्यामेरा जडानका सम्पूर्ण प्राविधिक कार्य योगेस प्याकुरेलले जिम्मेवारीपूर्वक सम्पन्न गरेका हुन्।
स्थानीय बिरबहादुर थक्लुङले सिसि क्यामेरा सञ्चालनका लागि आवश्यक पर्ने बिजुलीको शुल्क टंक थक्लुङको घरबाट तिरिने व्यवस्था मिलाइएको जानकारी दिए। समुदायकै स्रोत, सहयोग र श्रमबाट स्थापित यो सुरक्षा संयन्त्रले आपराधिक गतिविधि नियन्त्रण, दुर्घटना रोकथाम तथा सार्वजनिक अनुशासन कायम गर्न सहयोग पुग्ने अपेक्षा गरिएको छ।
थक्लुङ चोकका स्थानीय बासिन्दाले देउसी–भैलोबाट संकलित रकम समाजहितमा खर्चिन पाएकामा खुसी व्यक्त गर्दै आगामी दिनमा पनि यस्ता सामुदायिक पहल निरन्तर जारी रहने बताएका छन्।